التاسك السادس الجزء الاول

التاسك السادس الجزء الاول

مساء الخير ياشباب 😃

اول جزء بتاع امبارح اغلبكم مفيش مشكلة عنده فيه .. جزء بسيط مجرد متغيرات وتعملّهم معادله سواء جمع او طرح او ضرب 😃

وانواع الـ data types وكل واحده تختلف عن التانيه فايه وتستخدمها امتا 

نيجى بقا للحتة اللى بعدها ... If statement 

دى مش كل الناس شافتها سهلة .. فى ناس اتلغبطت فيها 

دلوقتى المفروض معاد التاسك واسفين لو اتأخر شويه 

بس قبل ماابعت التاسك هشرحهلكم بسرعه واحاول انها تكون طريقه فهم سهله مفيهاش تعقيد 😃

وفالاخر هكتبلكم التاسك تحت الشرح .. اللى عارف الكلام ده يفضل بردو يقراه ياشباب جايز يكون فيه حاجه جديده ☺

===========================

امبارح كانت كل المسائل عباره عن معادلات .. جمع + .. طرح - .. ضرب*

من واحنا صغيرين كانوا يقولولنا ابداليه الجمع والضرب وان الطرح مينفعش وكانوا بيضحكوا علينا فالاخر 😂😂

لان كبرنا شويه وعرفنا ان فى ارقام سالبه ممكن تكون ناتج عمليه طرح عادى كدا .. فبالتالى بقا الطرح كمان مفيهوش مشكله 😃

طب والقسمه؟!!!

الحاجة اللى الكل متفق عليها وان ملهاش ناتج فالرياضه هى القسمه على صفر 

انت كواحد عاقل عندك عقل يميز مابين هل الرقم ده صفر وللا اى حاجه تانيه .. "بتختبر" وتحط "شرط" هل المقسوم عليه ده صفر وللا لا 

لو اجابتك كانت "اه" ده صفر بتسيب المسألة وتقول مش هتنفع القسمه ولو كانت اجابتك "لا" بتم عملية القسمه وبتطبعلها ناتج ... طب والكمبيوتر؟!!!

----------------------------------------------

لو حد حط قدامك رقمين وقالك طلعلى الاكبر .. عقلك بسرعه هيروح "يختبر" ويحط "شرط" هوا الرقم ده اكبر من الرقم ده .. لو اجابتك "اه" بتقوله الرقم ده هو اللى اكبر ولو اجابتك "لا" بتقوله الرقم التانى هو اللى اكبر ... طب والكمبيوتر؟!!! :D

----------------------------------------------

لو حد حط قدامك -2 و 10 وقالك قولى مين الموجب ومين السالب .. بسرعه عقلك بيعمل "اختبار" وبيحط "شرط" هل -2 اصغر من الصفر .. اه يبقا هو السالب .. طب والكمبيوتر؟!!! 😄😄

----------------------------------------------

لو حد قالك طلعلى الرقم الزوجى مابين 20 و 25 .. بسرعه عقلك هيقول 20 .. ليه؟

علشان معلومة ان الرقم الزوجى ينفع يتقسم على 2 موجوده فعقلك بسرعه "بيختبر" ويحط "شرط" هل ده ينفع يتقسم على 2 وللا لا

طب وهو يعنى ايه ينفع يتقسم على 2 اصلا!!! .. الجملة دى معناها ان الرقم يتقسم على 2 ومايكونش فى "باقى للقسمه" .. يعنى ايه بردو؟

يعنى انا مثلا لو قولتلك 10/2 بكام .. هتقولى بـ5 

بس؟ اه بس .. يعنى مفيش باقى للقسمه هى 5 وبس

انما لو قولتلك 25/2 بكام؟ هتقولى 12.5 ... اتناشر ونص 😂😂

يعنى 12 وشويه .. يعنى فى باقى للقسمه 

كل ده انت بتبقا عارفه وف اقل من ثوانى بتعمله ... طاااب والكمبيوتر؟!!! 😂😂

-----------------------------------------------

كل المشاكل اللى فاتت دى كان لازم يبقا ليها حل نقدر نتعامل بيه مع الكمبيوتر اللى ولا بيفهم لغتنا ولا عارف ايه زوجى وايه فردى وللا ايه سالب وايه موجب؟

ولان طبعا الكمبيوتر مش معمول بس علشان يحل معادلات تافهه هو اكبر من انه يحلها اساسا 😂😂

فهنااا اتعملت if statement

-----------------------------------------------

هى قاعده تقدر بيها انك بالبلدى كدا تتشرط على الجهاز 😂😂

بتخليه "يختبر" بانك تحطله "شرط" وهو يشوف ..

هنا بقا نيجى لحتة الشرط 

- انا لو ماما جت قالتلى جعانه؟ .. وقولتلها "اه" .. "هتعملى اكل" . انما لو قولتلها "لا" .. خلاص مش هتعمل حاجه

ودى اول حاله للشرط انه يكون ليه احتمال واحد بس .. وهنا بنستخدم if بس 

- لو اختك الصغيره معاها توكتين كل واحده ليها لون وجت سألتلك .. الازرق احلى من الاحمر؟ .. لو قولتلها "اه" "هتختار الازرق" .. ولو قولتلها "لا" "هتختار الاحمر"

ودى تانى حاله للشرط انه يكون ليه احنمالين . وهنا بنستخدم if ... else 

-الحالة التالته وهى الحالة اللى ليها تفريع من احتمال واحد بس .. يعنى لو مثلا قولت "اه" فصاحب السؤال ينفذ حاجه انما لو قولت "لا" تلاقيه سألك سوال تانى والعكس

وهناا بنستخدم if .. else if 

-----------------------------------------------

طيب ده بقا يتكتب ازاى كود؟!!

واحده واحده ياشباب 

اول حاجه انت بتكتب الامر اللى بيه الكمبيوتر هيفهم انه داخل على شرط وهو امر if

بعدها المفروض انك هتسأله السؤال يعنى هتديله "الشرط" .. فهتفتح قوسين وتكتب جواهم الشرط ... if (x>y) ...**الكتابه بتكون متشقلبة بس انا هعتبر انكوا فهمتونى 😂😂

نيجى بقا لشرط if ده ... بيتكتب ازاى؟!

كلنا طبعا عارفين علامه الـ= والـ> والـ< والـ أ، .. الخ

فى بقا كذا علامه من دول الكمبيوتر مش بيشوفهم زيى مااحنا بنشوفهم

اول حاجه علامة ال= .. الكمبيوتر مش بيشوفها غير كدا == ***ده فحالة الشرط بسس ياشباب يعنى فحالة اللى بيتكتب جوا قوسين if ****

لو كتبتها = واحده بس الكمبيوتر بيفهمها حاجه تانيه فالشرط وممكن يطلعلك ايرور كمان

تانى حاجه هى حرف الـ "و" عندنا .. يعنى لو عاوز تقوله هل كذا اكبر من كذا **و** كذا اكبر من كذا .. الكمبيوتر بيفهمها كدا && *and* ودى الكومبيوتر بينفذ امرها اللى تحت لو الشرطين صح .. الاتنين مع بعض صح .. مينفعش يبقا واحد منهم صح والتانى غلط

if (x>y && y>z)

تالت حاجه اللى هى "او" .. ودى الكمبيوتر بيفهمها كدا || *or* والكمبيوتر بينفذ امرها لو على الاقل واااحد بس من الشروط صح .. يكفى وااحد بس

if (x>y || y>z)

رابع حاجه هى علامه => و =< عندنا فالرياضه ال= بتتكتب شرطه تحت الاكبر والاصغر .. لا هنا مفيش الكلام ده الكمبيوتر بيفهمها كدا 😂😂

----------------------------------------------

خلاص كتبنا الشرط نيجى بقا للحالات

اول حاله اللى هى حالة if 

ودى ابسط الحالات .. بتكتب امر if وبتفتح القوسين وتكتب جواهم الشرط

بمجرد ماتدوس enter بتلاقى السطر نزل بس فى مسافه عن بدايه السطر اللى قبله .. ده لان الكمبيوتر متبرمج انه بعد الشرط لو "اه" هينفذ حاجه .. هنا بقااا فى ملحوظه

لو انت هتنفذ كذا حاجه يعنى مثلا هتقوله لو الشرط صح اجمعلى كذا مع كذا واطبعلى كذا واقسملى كذا .. دول لما تيجى تكتبهم هتكتبهم ف 3 سطور اكيد

هتلاقى اول سطر بسسس هو اللى فيه المسافه اللى قولت عليها فوق والباقى هيتكتب تحت سطر الشرط عادى .. طب ده ليه؟؟!!

ده لان الكمبيوتر متبرمج انك لو كتبت الشرط بالشكل ده فهو هينفذ حاجه واحده بس *حاجه افتراضيه يعنى*

طب والحل؟؟ .. الحل انك تفتح القوسين دول {}

طبعا دول انتوا بتشوفوهم فدالة الmain بتلاقوا واحد من فوق وواحد من تحت بعد return 0

القوسين دول ** ولازم دول مش اى قوسين تانى** زى الربطه اللى بتربط الاوامر كلهاا اللى عاوز تنفذها علشان تقول للكمبيوتر نفذلى دول كلهم 

if (x>y)

{

cout<<"X";

}

ده مثال بسيط للحكايه دى ** واتمنا الكود ميتشقلبش لما البوست يتنشر 😂😂 **

بتكتب امر if وتكتب الشرط جوا قوسين *** من غير سيمى كولون دى حاجه مهمه جداا بعد الشرط مش بنكتب سيمى كولون*** هتدوس enter فهتلاقى السهم زى ماقولت نزل تحت واخد مسافه .. طب انت عاوز تنفذ كذا شرط فهتفتح القوس ده } .. بمجرد ماتفتحه هتلاقى التانى اتكتب تلقائيا .. دوس Enter هتلاقى القوسين بقوا تحت بعض وموشر الكتابه مابينهم وواخد المسافه بتاعت اول السطر لو كتبت امر ودوست enter هتلاقى السطر نزل تحتيه على طول يعنى الكمبيوتر خلاص فهم انك هتكتب امر تانى هينفذو لو الشرط اتحقق 

ليه بقول الحته دى بالتفصيل الملل وبقولكوا كمان الخطوات .. لان ده **افضل** شكل لكتابة اوامر الشرط ونصيحه حتا لو هتكتبوا امر واحد بردو اعملوا الاقواس وبنفس الشكل ده يعنى خلوهم تحت بعض .. ده اريح ليكوا كمبتدئين والله

تانى حاله اللى هى if .. else .. هى شبه الاولى بتكتب الامرif والشرط والاوامر اللى تتنفذ لو الشرط صح .. بتدوس enter وبتكتب امر else وتختلف عن امر if بانها مش بيتكتب بعدها شرط ** الشروط بتتكتب بعد امر if بس ** ودى الحاله اللى قولنا فوق ان ليها احتمالين .. وبتكتب الاوامر اللى هينفذها لو الشرط مش صح 

تالت حالة والاخيره دى نفس النظام فجزءها الاول انما الجزء التانى بيبقا امر else if وطبعا اتفقنا ان اى شرط بيتكتب ورا امر if فهنا هيتكتب شرط تانى بامر if وشرط جديد .. ودى حاله وجود تفريع فاحدى الاحتمالين 

-----------------------------------------------------

بوست طوييييل انا عارفه بس هيتقرى غصب واقتدار علشان التاسك ياحلوين 😂😂 اتمنى ان يكون فهمه بسيط وسهل وان قاعده if statement تكون وضحت وبقت اسهل عليكوا ان شاء الله ☺

فالبوست ده هيكون فى سؤال واحد بسيط هشوف بس الناس هتطبق اللى قولته ازاى 

والتاسك التانى هيبقا فى كذا سؤال ان شاء الله

===================================

Read three floating values (A, B and C) and verify if is possible to make a triangle with them. If it is possible, print "They can make a triangle" and calculate the perimeter

طبعا احنا ناااس بتوع علمى رياضه 😂😂💪

يعنى عارفين شرط عمل مثلث 😂😂👊

يلا انطلقوووا